【「周一情侶」晒合拍】RM七位成員齊做招牌動作冧fans

香港fans送上蛋糕，劉在錫鞠躬致謝，Gary同智孝仲好有默契咁舉起手指。
‧成員做出《RM》嘅指定動作、fighting手勢等，令fans好鬼興奮！
‧訪問環節，金鐘國透露兩個月前決定嚟香港，佢哋就開始各自抽時間做準備。
‧劉在錫爆光洙同智孝要用長啲時間排舞，又讚金鐘國同HaHa跳舞好叻。
‧李光洙同金鐘國就即興喺台上表演咗一小後舞

《Running Man》(RM)佢哋今晚首度以齊人姿態嚟到亞博館開見面會《Race Start ! Season 3: RM Special Tour in Asia》，七位成員劉在錫、金鐘國、李光洙、宋智孝、Gary、HaHa以及池錫辰就先到香港天際萬豪酒店出席記者會。

約下午1時40分，穿上白色衫現身嘅劉在錫就帶頭同另外六名成員齊齊出席記招。一出場，佢哋就先以廣東話：「你好」同大家打招呼，當中劉在錫更四度鞠躬，而「周一情侶」宋智孝同Gary仲好夾咁反戴cap帽，企埋一齊現身，非常識做。Gary一出場就搞笑地用廣東話講：「大家好，我係哥哥。」

問到成員來港有咩感受，劉在錫表示：「因此係第一次齊人嚟港，所以好期待同好多謝大家，今晚會努力演出，希望大家睇得開心。」至於今晚有乜嘢特別表演時，宋智孝就透露會跳舞；Gary就話今晚嘅演出精采到連大家眨眼嘅機會都冇；而池錫辰就透露會表演陳奕迅新歌《無條件》，更即席唱咗一句。

當香港fans送上蛋糕時，成員都表示好開心，劉在錫更鞠躬多謝粉絲，而「周一情侶」Gary同宋智孝就默契十足要舉起手指。

到祝酒時，劉在錫就行晒全台，跟主辦方及每一位成員祝酒。影合照時，成員應要求做晒《RM》嘅指定動作、fighting手勢等，成員都一一照做，又每個方向都做一次，非常識冧傳媒。

訪問環節時，問到今次有咩特別環節俾港迷，池錫辰表示因為係首次齊人，所以覺得好開心。金鐘國就透露，兩個月前決定嚟香港，佢哋就開始各自抽時間做準備。劉在錫就表示練跳舞時，金鐘國同HaHa就因為好叻跳舞，所以冇難度，但佢、光洙同智孝就要用長啲嘅時間。

會上成員就互讚對方，劉在錫表示好期待池錫辰嘅表演，而池錫辰就表示好期待智孝嘅演出，又話：「因為智孝係隊中惟一一個女仔。」李光洙同金鐘國就即興喺台上表演咗一小後舞。劉在錫更踢爆當中有成員練舞練咗好耐，到噚日上機前都仲練緊，叫大家今晚留意吓，估係邊一個。