RunningMan(런닝맨)情報站

(香港蘋果)

由朴寶英同趙正錫飾演嘅tvN新劇《Oh我的鬼神君》噚日播出第九集，上集講到姜善宇(趙正錫飾)忍唔住錫咗羅奉仙(朴寶英飾)，佢哋就開始拍拖，而被處女鬼上咗身嘅奉仙為咗盡快同善宇發生關係，於是就喺佢哋成為戀人嘅第二日，奉仙就提議同善宇去兩日一夜嘅旅行，又幻想着點同善宇度春宵。

就連佢哋收工後嘅第一個約會都係奉仙做主動，喺晚飯時，奉仙用腳去磨善宇嘅腳，又突然將手放喺善宇嘅大髀，跟住奉仙變本加厲，聲稱想去食刨冰，點知就捉咗善宇去Motel，搞到善宇都冇佢咁好氣問：「你係鍾意我定鍾意我身體？呢種事原本唔係女人問嘅問題。」仲強調自己係保守男唔會咁易曳曳。唔少觀眾睇完都留言話被鬼馬嘅奉仙搞到啼笑皆非。

至於喺劇中睇起上嚟好似好好人，又係善宇妹夫嘅崔成財（林朱煥飾），佢嘅身份越嚟越惹觀眾好奇，特別噚晚一集中，佢同處女鬼申順愛個爸爸交談時，留意到順愛爸爸嘅綁鞋帶方式同順愛綁嘅一模一樣，順愛爸爸就話係奉仙同佢綁，成財即時流露出深不可測嘅表情，令觀眾好奇不已。